میرا خاموش رہ کر بھی انہیں سب کچھ سنا دینا || کلام قمر جلالوی || mera khamosh reh kr bhi lyrics

 

میرا خاموش رہ کر بھی  انہیں سب کچھ سنا دینا

زبان سے کچھ نہ کہنا  دیکھ کر آنسو بہا دینا

 

نشیمن ہو نہ ہو یہ تو فلک کا مشغلہ ٹھہرا

کہ دو تنکے جہاں پر دیکھنا بجلی گرا دینا

 

میں مجرم ہوں مجھے اقرار ہے جرم محبت کا

مگر پہلے خطا پر غور کرنا پھر سزا دینا

 

اجازت ہو تو کہہ دوں قصۂ الفت سر محفل

مجھے کچھ تو فسانہ یاد ہے کچھ تم سنا دینا

 

ہٹا کر رخ سے گیسو صبح کر دینا تو ممکن ہے

مگر سرکار کے بس میں نہیں تارے چھپا دینا

 

میں اس حالت سے پہنچا حشر والے خود پکار اٹھے

کوئی فریاد والا آرہا ہے راستہ دینا

 

قمرؔ وہ سب سے چھپ کرآ رہے  فاتحہ پڑھنے

کہوں کس سے کہ  میری شمعِ تربت کو بجھا دینا