ادارہ معین الاسلام بیربل شریف | تاریخ، تعلیمی خدمات اور 2026ء کی شاندار کامیابیاں | Idara Moeen ul Islam Birbal Shareef 2026

تعارف ادارہ

برصغیر پاک و ہند میں قرآن مجید اور علوم دینیہ کی اشاعت و ترویج میں خانقاہی نظام نے بہت اہم کردار ادا کیا ہے۔ اولیائے کرام نے اشاعت اسلام اور روحانی رہنمائی کے ساتھ ساتھ فروغ علم کے لیے بھرپور کوششیں کیں۔ انھیں نفوس قدسیہ کی بدولت اسلام کی روشنی برصغیر کے کونے کونے میں پھیلی۔ ”خانقاہ مرتضویہ“ بیربل شریف کا شمار بھی انہی قدیم عظیم خانقاہوں میں ہوتا ہے۔ اس خانقاہ کی بنیاد جنیدِ وقت حضرت اعلیٰ خواجہ حافظ غلام مرتضیٰ رحمتہ اللہ علیہ نے ۱۲۷۰ھ / ۱۸۵۳ء میں بیربل شریف میں رکھی۔ بیربل شریف ضلع سرگودھا کی تحصیل شاہ پور کے مضافات میں دریائے جہلم کے کنارے آباد ایک دور افتادہ بستی ہے۔

حضرت غلام مرتضیٰؒ کی ولادت ۱۲۵۱ھ / ۱۸۳۵ء میں بیربل شریف کے ایک مردِ صالح حضرت حافظ محمد اسلم رحمتہ اللہ علیہ کے کاشانہ میں ہوئی۔ آپ نے حفظِ قرآن مجید کے ساتھ ساتھ ابتدائی تعلیم اپنے والد ماجد سے حاصل کی۔ ان کے وصال کے بعد آپ نے ضلع جہلم کے قصبہ (لِلہ شریف) میں حضرت خواجہ غلام نبی للّہی رحمتہ اللہ علیہ کی خدمت میں رہ کر متداولہ علوم پر عبور حاصل کیا۔ زمانہ طالب علمی میں ہی آپ نے قطب الاقطاب حضرت خواجہ غلام محی الدین قصوری دائم حضوریؒ کے دستِ حق پرست پر بیعت کی۔ صرف اٹھارہ سال کی عمر میں ظاہری اور باطنی علوم میں کمال حاصل کیا۔ ۱۲۷۰ھ / ۱۸۵۳ء میں بیربل شریف آئے اور ایک عظیم درسگاہ کی بنیاد رکھی۔ برصغیر کے کونے کونے سے تشنگانِ علم و عرفان اس چشمے سے پیاس بجھانے لگے۔

 پنجاب میں سکھوں کا دور ایک پرآشوب دور تھا۔ جس میں کلمہ حق بلند کرنا اور دین اسلام کی تبلیغ و اشاعت کا کام انتہائی مشکل تھا ۔ حضرت اعلیٰ غلام مرتضیٰؒ نے اس دور میں ایک دور افتادہ چھوٹے سے گاؤں میں ایک عظیم تعلیمی مشن شروع کیا اور مسلسل نصف صدی تک استقامت سے اس کی آبیاری فرماتے رہے۔ آپ کے وصال ۱۳۲۱ھ / ۱۹۰۳ء کے بعد آپ کے اخلاف میں اگرچہ روحانی فیوضات کا سلسلہ جاری رہا لیکن درس و تدریس کی وہ رونقیں بوجوہ بحال نہ رہ سکیں۔

ادارہ معین الاسلام کی بنیاد اور خدمات

اللہ تعالیٰ کو خانوادہ مرتضوی کے اس عظیم تعلیمی سلسلہ کا احیاء مقصود تھا، چنانچہ حضرت اعلیٰ غلام مرتضیٰؒ کی چوتھی پشت میں آفتابِ ولایت حضرت خواجہ معین الدین چشتیؒ نے اس علمی سلسلہ کے احیاء کے لیے ٹھوس منصوبہ بندی فرمائی۔ مہمان خانہ میں مزید چار کمروں کی تعمیر کی اور اپنے اکلوتے نور نظر پروفیسر صاحبزادہ محبوب حسین کو دینی تعلیم کے حصول کے لیے وقف کر دیا۔

صاحبزادہ صاحب نے اپنے تعلیمی سفر کا آغاز ۱۹۶۵ء میں جامعہ محمدی شریف ضلع جھنگ سے کیا۔ پھر جامعہ اسلامیہ بہاولپور سے بی اے کرنے کے بعد پنجاب یونیورسٹی سے ایم اے عربی اور ایم اے اسلامیات کے امتحانات پاس کیے۔ اس دوران آپ نے چاروں علوم شرقیہ (عربی، فارسی، اردو، پنجابی) میں بھی فاضل کیا۔ جامعہ حزب الاحناف لاہور میں امام اہل سنت حضرت سید احمد ابو البرکاتؒ کی خدمت میں دورہ حدیث شریف مکمل کیا۔ حضرت مولانا شاہ احمد نورانیؒ نے اپنے دستِ مبارک سے دستارِ فضیلت بندھائی۔ دورانِ تعلیم قرآن پاک حفظ کیا۔ تعلیم مکمل کرنے کے بعد ۱۹۷۶ء میں بطور لیکچرار سروس جوائن کی ۔ ۱۹۸۱ء میں دورانِ ملازمت حکومت کی طرف سے سکالرشپ پر جامعۃ الرياض سعودی عرب میں جدید عربی زبان کی تعلیم کے حصول کے لیے مقیم تھے کہ والد گرامی حضرت خواجہ معین الدین چشتیؒ کا انتقال ہو گیا۔ صاحبزادہ صاحب وطن واپس تشریف لائے اور والد گرامی کی خواہش کے مطابق ۲۵ شعبان المعظم ۱۴۰۱ھ / ۱۹۸۱ء میں ادارہ معین الاسلام کی بنیاد رکھی۔ یوں ایک صدی بعد بزرگوں کی توجہات اور دعاؤں سے بیربل شریف میں درس و تدریس کی وہ رونقیں پھر بحال ہو گئیں جو حضرت اعلیٰؒ کے وصال کے بعد ماند پڑ گئی تھیں۔

ادارہ کے قیام کے بعد ابتدائی دور میں آپ کو بے پناہ مسائل کا سامنا رہا، لیکن کٹھن حالات کے باوجود آپ نے اپنا سفر جاری رکھا، اور 45 سال کی قلیل مدت میں محنت اور کامیابیوں کی شاندار تاریخ رقم کر دی۔ چار کمروں، ایک استاد اور پانچ طلباء سے سفر کا آغاز کرنے والا یہ ادارہ الحمد للہ آج ۹ کیمپسوں مرتضوی بلاک (مرکزی کیمپس)، اجمیری بلاک (عظیم الشان مسجد گنج شکرؒ اسی بلاک میں ہے)، دربار شریف ایجوکیشنل کیمپس (مرکز تجوید وقرأت)، معین آباد کیمپس، مرتضیٰ آباد کیمپس، نظام الدین اولیاء کیمپس (نظام نگر)، داتا گنج بخش بلاک (رحمٰن آباد)، غوث اعظم اسلامک سنٹر (فرید نگر)، معین الاسلام کالج شریعہ (محبوب آباد)، جامعہ غوثیہ (کڈھبھی جھاوریاں)، کیمپسز کے دو سو سے زائد کمروں پر مشتمل ایک عظیم ادارہ کی صورت اختیار کر گیا ہے۔ زیرِ تعلیم طلباء کی تعداد چودہ سو (1400) سے تجاوز کر گئی ہے، جبکہ درسِ نظامی کے طلباء کی تعداد 700 ہے۔ ایک سو پچاس (150) سے زیادہ محنتی، ذہین اور انتھک اساتذہ کرام دن رات فروغِ تعلیم کے لیے کوشاں ہیں۔ ادارہ معین الاسلام کا آغاز شعبہ حفظ سے ہوا۔ پھر حفاظ کے لیے شعبہ تجوید و قرأت کا اجراء ہوا۔ تجوید کے اس دو سالہ کورس میں طلباء کی تعداد دو سو (200) سے تجاوز کر چکی ہے۔ ادارہ معین الاسلام کو پاکستان کے ان اداروں میں ایک منفرد مقام حاصل ہے۔ جہاں پر قراءتِ سبعہ عشرہ کی تدریس کا بہترین انتظام موجود ہے۔

 معین الاسلام کالج آف شریعہ

 شعبہ حفظ و تجوید کے اکثر مدارس میں جدید عصری علوم کی تعلیم نہیں دی جاتی۔ لہٰذا اکثر طلباء دورانِ حفظ زائد العمر ہو جانے کی وجہ سے اپنے ہم عمر طلباء سے عصری علوم میں کئی تعلیمی سال پیچھے رہ جاتے ہیں اور احساسِ کمتری کا شکار ہو جاتے ہیں۔ نیز زائد العمر ہو جانے کی وجہ سے انہیں اعلیٰ تعلیمی اداروں میں داخلہ اور ملازمتوں کے حصول میں دشواری کا سامنا کرنا پڑتا ہے، بلکہ اکثر حفاظ کے پاس سرے سے دنیاوی تعلیم ہوتی ہی نہیں۔ یوں وہ حافظِ قرآن ہونے کے باوجود ان پڑھ افراد میں شمار ہوتے ہیں۔

 ناظمِ ادارہ نے ایسے حفاظ کو عصری علوم سے روشناس کروانے اور دورانِ حفظ طلباء کے قیمتی تعلیمی سال ضائع ہونے سے بچانے کے لیے معین الاسلام کالج آف شریعہ کی بنیاد رکھی۔ الحمد للہ یہ تجربہ کامیاب رہا ہے۔ ادارہ معین الاسلام دینی اور جدید عصری علوم کے امتزاج کی عمدہ مثال ہے، جہاں طلباء کو حفظِ قرآن، تجوید و قرأت، درسِ نظامی، ادیب عربی، عالم عربی، فاضل عربی، ثانویہ عامہ، ثانویہ خاصہ، الشہادۃ العالیہ اور الشہادۃ العالمیہ (تنظیم المدارس) کے ساتھ مڈل سے لے کر ایم اے تک تعلیم کا ایک جامع اور جدید نظام موجود ہے۔ بہترین علمی ماحول کی وجہ سے ہر سال تمام امتحانات میں بہترین نتائج سامنے آ رہے ہیں۔ اکثر امتحانات میں کامیاب ہونے والے طلباء کا تناسب سو فیصد ہے۔ بورڈ اور یونیورسٹی کے امتحانات میں طلباء پوزیشنیں حاصل کر رہے ہیں۔ سو سے زائد طلباء وزیراعلیٰ پنجاب کی سکیم کے تحت لیپ ٹاپ اور سولر لیمپ کے انعامات پا چکے ہیں۔ کئی طلباء ملک کی ممتاز جامعات میں ایم فل اور پی ایچ ڈی کر چکے اور کر رہے ہیں۔ ادارہ کی یہ کامیابیاں اللہ تعالیٰ کے فضل و کرم، سرکارِ دو عالم صلی اللہ علیہ وآلہ وسلم کے طفیل، اولیائے کرام کے فیضان کے علاوہ ناظم ادارہ کی پرخلوص کاوشوں اور محنتی اساتذہ کی مرہونِ منت ہیں۔ الحمد للہ ثم الحمد للہ!

 سال 2026ء ہمارے ادارے کے لیے علمی و تعلیمی اعتبار سے غیر معمولی کامیابیوں، قابلِ فخر نتائج اور تابندہ روایات کا سال رہا۔ اللہ تعالیٰ کے فضل و کرم سے ہمارے طلباء نے دینی اور عصری تعلیم کے میدان میں اپنی محنت، قابلیت اور عزم و استقلال کا شاندار ثبوت پیش کیا۔

 دینی علوم کے شعبے میں متوسطہ (مڈل) سے لے کر الشہادۃ العالمیہ (ایم اے عربی و اسلامیات)، کے تمام امتحانات تنظیم المدارس اہل سنت پاکستان سے، طلباء نے نمایاں کامیابیاں حاصل کر کے ادارے کا نام روشن کیا۔ اسی طرح عصری تعلیم کے میدان میں مڈل سے لے کر پی ایچ ڈی (Ph.D) تک کے مختلف تعلیمی مراحل میں طلباء نے بہترین نتائج کے ذریعے اپنی علمی استعداد اور صلاحیتوں کا لوہا منوایا۔

 یہ کامیابیاں محض امتحانی نتائج کا مجموعہ نہیں بلکہ ایک ایسے علمی و تربیتی سفر کی عکاس ہیں جس کی بنیاد اخلاص، محنت، نظم و ضبط، مسلسل جدوجہد اور حصولِ علم کے پختہ جذبے پر استوار ہے۔ دینی و دنیاوی علوم کے حسین امتزاج کے ذریعے طلباء کی ایسی نسل تیار کرنا ہمارا مقصد ہے جو علم و عمل، کردار و اخلاق اور شعور و آگہی کے اعتبار سے معاشرے کے لیے باعثِ افتخار ہو۔

بلا شبہ ان کامیابیوں کے پسِ منظر میں طلباء کی شبانہ روز محنت، اساتذہ کرام کی بے لوث خدمات، والدین کی دعائیں، سرپرستوں کا اعتماد اور ادارے کی مسلسل تعلیمی و انتظامی کاوشیں شامل ہیں۔ ہم ان تمام احباب کو دل کی گہرائیوں سے مبارک باد پیش کرتے ہیں جن کی محنت اور تعاون نے ان کامیابیوں کو ممکن بنایا۔

 ہم اپنے تمام کامیاب طلباء کو مبارک باد پیش کرتے ہوئے اس عزم کا اعادہ کرتے ہیں کہ علم و تحقیق، دینی شعور، اخلاقی تربیت اور جدید عصری تقاضوں سے ہم آہنگ تعلیم کے فروغ کے لیے اپنی کوششیں مزید بہتر اور مؤثر انداز میں جاری رکھیں گے۔

ہماری منزل صرف امتحانات میں کامیابی نہیں، بلکہ ایسے صاحبِ علم، صاحبِ کردار اور صاحبِ بصیرت افراد کی تیاری ہے جو دین، ملت اور انسانیت کے لیے مفید ثابت ہوں۔ اللہ رب العزت اس علمی سفر کو قبول فرمائے، کامیابیوں کے اس سلسلے کو دوام عطا فرمائے اور ہمارے طلباء کو علمِ نافع، عملِ صالح اور خدمتِ خلق کی توفیق سے نوازے۔ آمین یَا رَبَّ الْعٰلَمِیْنَ!.

ادارہ معین الاسلام، ادارہ معین الاسلام بیربل شریف، خانقاہ مرتضویہ، بیربل شریف، خواجہ غلام مرتضیٰ، خواجہ معین الدین چشتی، پروفیسر محبوب حسین، دینی مدارس، دینی و عصری تعلیم، کالج آف شریعہ، درس نظامی، حفظ قرآن، تجوید و قرأت، قراءت سبعہ عشرہ، اسلامی تعلیمات، تعلیمی کامیابیاں 2026، Idara Moeen Ul Islam, Bairbal Sharif, Islamic Education, Islamic Institute, Khanqah Murtazvia

Read More

حدیث کے بغیر قرآن کی تفسیر فتنے کا موجب ہے | اتحادِ امت میں حدیثِ نبوی ﷺ کا کردار | Proff Dr Muhammad Shahbaz Manj

حدیث کے بغیر قرآن کی تفسیر فتنے کا موجب ہے

قرآن کی ایسی تفسیر جو محض لغت اور زبان کی روشنی میں کی جائے، اور اس کے لیے حدیثِ نبوی سے رہنمائی نہ لی جائے، فتنے و فساد کا موجب بنتی ہے۔ حدیث کو چھوڑ کر قرآن کی تفسیر بچوں کا کھیل بن جاتی ہے، اور ہر شخص قرآنی الفاظ سے اپنے مطلب کے معانی و مفاہیم نکال سکتا ہے۔ مشہور نو مسلم صاحبِ علم علامہ محمد اسد (1900ء - 1992ء) کے مطابق عصرِ حاضر کے مغرب پسند، حدیث کا انکار اسی لیے کرتے ہیں کہ اس طرح قرآن سے اپنے من پسند معنی نکالنا اور قرآنی آیات کے مطالب کو توڑ مروڑ کر مغربی افکار و خیالات کے مطابق ڈھالنا آسان ہو جاتا ہے:

"many among the present generation of Muslims are ready to adore everything that is Western ...it becomes easier to twist the teachings of the Qur'ān in such a way that they might appear to suit the spirit of Western civilization."

علامہ اسد نے بالکل صحیح کہا ہے۔ منکرینِ حدیث کی تفاسیر دیکھیں تو نہایت غلط اور عجیب و غریب تاویلات ملتی ہیں اور دینِ اسلام کا چہرہ مکمل طور پر مسخ نظر آتا ہے۔

حدیث اتحادِ امت کا ذریعہ ہے

حدیث سے دوری کی بنا پر قرآن کی تفسیر بازیچۂ اطفال بن جاتی ہے اور امت میں اختلاف و انتشار کا دروازہ کھل جاتا ہے۔ لیکن اگر حدیث کو رہنما بنایا جائے تو امت میں تفرقہ و افتراق کے خاتمے اور باہمی اتحاد و یگانگت میں مدد ملتی ہے۔ حضور ﷺ کے وصال کے بعد جب خلافت کا جھگڑا پیدا ہوا: تو حضرت ابو بکر صدیق رضی اللہ عنہ نے حضور کی حدیث پیش فرمائی کہ: الْاَئِمَّةُ مِنْ قُرَيْشٍ "خلفاء قریش میں سے ہوں گے۔" تو سب لوگوں نے گردن تسلیم خم کر دی اور جھگڑا ختم ہو گیا۔ ایسے ہی اور بھی کئی مواقع پر حضور ﷺ کی احادیث نے مسلمانوں میں باہمی نزاع کو ختم کرایا۔ آج بھی حدیث ہی ہے، جس کی بنا پر جمہورِ امت دین کی بنیادی باتوں میں عام طور پر متفق ہے۔   یہاں یہ سوال ذہن میں آ سکتا ہے کہ حدیث اتحاد و اتفاق کا ذریعہ ہے تو اس کے قائلین میں انتشار و تشتت کیوں ہے؟ اس حوالے سے یہ امر پیشِ نظر رہنا چاہیے کہ ایک تو محض اختلاف کوانتشار و تفرقہ نہیں سمجھنا چاہیے، اختلاف اگر علمی ہو اور صحت مند اندازِ اختلاف سے سامنے آئے تو برا نہیں، بلکہ مطلوب و محمود ہے، اس نوع کے اختلاف کو رحمت قرار دیا گیا ہے، دوسرے یہ کہ وہ اختلاف جو تفرقے کا سبب بنتا ہے، اس کے پس منظر میں زیادہ تر متعلقہ لوگوں کی شخصی کمزوریاں اور دنیوی مفادات وغیرہ کارفرما ہوتے ہیں، اس کو حدیث کے سر جڑ دینا کسی طرح معقول رویہ نہیں۔ اگر گروہی و سفلی مفادات و تعصبات سے اوپر اٹھ کر اور خالص علمی نقطۂ نظر سے دیکھا جائے تو مسلمانوں میں اختلاف جو کچھ بھی ہے وہ بنیادی طور پر اور بالعموم علمی و فروعی ہی ہے، اور اسی نوعیت کا اختلاف ہے، جو دراصل مضرت رساں نہیں۔ لیکن بد قسمتی سے نادان اور کم فہم لوگ شدت اختیار کر کے فرقہ بازی پر اتر آتے ہیں، اور یہی وہ نادانی پر مبنی فرقہ بازی ہے، جس کے مظاہر ہم مسلمانوں میں عام مشاہدہ کرتے ہیں، اور ہر درد مند مسلمان جس سے نجات کی تمنا رکھتا ہے۔ ( ماخوذ از: انوار مصطفوی شرح اربعین نووی از پروفیسر ڈاکٹر محمد شہباز منج)

 

حدیث کے بغیر قرآن کی تفسیر، قرآن و حدیث کا تعلق، حدیث کی اہمیت، تفسیر قرآن میں حدیث کا کردار، منکرین حدیث، اتحاد امت، سنت نبوی کی اہمیت، قرآن کی صحیح تفسیر، حدیث اور قرآن، اسلامی تعلیمات، Hadees Ki Ahmiyat, Quran Aur Hadees, Tafseer Quran, Ittihad e Ummat, Muhammad Sohail Arif Moeeni

Read More

ایک نوجوان کے نام | علامہ اقبالؒ کی نوجوانوں کے لیے ولولہ انگیز نظم | نہیں تیرا نشیمن قصرِ سُلطانی کے گُنبد پر | عقابی روح

 

ایک نوجوان کے نام

عقابی رُوح جب بیدار ہوتی ہے جوانوں میں

نظر آتی ہے اس کو اپنی منزل آسمانوں میں

نہ ہو نومید، نومیدی زوالِ علم و عرفاں ہے

اُمیدِ مردِ مومن ہے خدا کے راز دانوں میں

نہیں تیرا نشیمن قصرِ سُلطانی کے گُنبد پر

تو شاہیں ہے، بسیرا کر پہاڑوں کی چٹانوں میں

ڈاکٹر علامہ محمد اقبالؒ 

(1877ء–1938ء)

علامہ محمد اقبال برصغیر کے عظیم شاعر، مفکر، فلسفی اور مسلمانوں کے فکری رہنما تھے۔ انہیں شاعرِ مشرق اور مفکرِ پاکستان کے نام سے یاد کیا جاتا ہے۔ ان کی شاعری کا بنیادی پیغام خودی، خود اعتمادی، عشقِ رسول ﷺ، عمل، بلند حوصلگی اور نوجوانوں میں بیداری پیدا کرنا ہے۔ اقبالؒ نوجوانوں کو شاہین کی علامت کے ذریعے بلند پروازی، آزادی، خودداری اور بلند مقاصد کا درس دیتے ہیں۔ ان کے نزدیک نوجوان کسی محدود ماحول یا معمولی مقصد کے لیے پیدا نہیں ہوا بلکہ اسے اپنی صلاحیتوں کو پہچان کر زندگی میں عظیم کامیابیاں حاصل کرنی چاہئیں۔

ایک نوجوان کے نام  ۔۔۔۔ علامہ اقبالؒ کی نوجوانوں کے لیے ولولہ انگیز نظم علامہ محمد اقبالؒ کی شاعری نوجوانوں کے لیے امید، حوصلے، خود اعتمادی اور بلند پروازی کا پیغام رکھتی ہے۔ وہ نوجوان کو شاہین کی طرح بلند نگاہ، خوددار، محنتی اور بلند مقاصد کا حامل دیکھنا چاہتے ہیں۔

1۔ عقابی روح اور بلند مقاصد اقبالؒ نوجوانوں کو عقاب کی مثال دیتے ہوئے یہ پیغام دیتے ہیں کہ جب کسی نوجوان کے اندر بلند حوصلگی، خود اعتمادی اور کچھ کر گزرنے کا جذبہ بیدار ہو جائے تو اس کی نگاہیں محدود نہیں رہتیں۔ وہ اپنی منزل آسمانوں میں تلاش کرتا ہے۔ عقاب کی طرح بلندی اس کا شوق اور مشکلات کا مقابلہ اس کی فطرت بن جاتا ہے۔

2۔ مایوسی سے بچنے کا درس اقبالؒ کے نزدیک مایوسی انسان کی علمی، فکری اور روحانی ترقی کے راستے میں بڑی رکاوٹ ہے۔ ایک سچا مومن اللہ تعالیٰ کی رحمت سے کبھی مایوس نہیں ہوتا۔ اسے اپنی محنت، صلاحیت اور اللہ تعالیٰ کی مدد پر بھروسا رکھنا چاہیے۔ مشکلات کتنی ہی بڑی کیوں نہ ہوں، امید کا دامن ہاتھ سے نہیں چھوڑنا چاہیے۔

3۔ شاہین جیسی خودداری اور بلند پروازی اقبالؒ نوجوان کو شاہین سے تشبیہ دیتے ہیں۔ شاہین کسی دوسرے کے سہارے زندگی نہیں گزارتا بلکہ اپنی محنت، جرأت اور خودداری سے اپنی منزل حاصل کرتا ہے۔ شاعر نوجوان کو سمجھاتے ہیں کہ تمہاری منزل محض آسائش، دولت اور اقتدار کے ایوان نہیں بلکہ بلند کردار، عظیم مقصد اور خودداری کی زندگی ہے۔

نوجوانوں کے لیے اقبالؒ کا پیغام آج کے نوجوانوں کو علامہ اقبالؒ کی شاعری سے بہت کچھ سیکھنے کی ضرورت ہے۔ نوجوان کسی بھی قوم کا قیمتی سرمایہ اور مستقبل کا معمار ہوتے ہیں۔ اگر نوجوان اپنے اندر علم حاصل کرنے کا شوق، محنت کا جذبہ، کردار کی مضبوطی اور اللہ تعالیٰ پر بھروسا پیدا کر لیں تو وہ اپنی ذات، خاندان اور قوم کے لیے عظیم خدمات انجام دے سکتے ہیں۔ ہمیں چاہیے کہ ہم مایوسی، سستی، بے مقصد زندگی اور دوسروں پر انحصار کرنے کی عادت سے بچیں۔ اپنے مقاصد بلند رکھیں، علم و عمل کو اپنا شعار بنائیں اور زندگی کے ہر میدان میں کامیابی کے لیے مسلسل کوشش کرتے رہیں۔ **اقبالؒ کا شاہین ہمیں یہی سبق دیتا ہے کہ بلند منزلیں بلند حوصلوں اور مسلسل جدوجہد سے حاصل ہوتی ہیں۔

علامہ اقبالؒ کی یہ نظم نوجوانوں کے لیے ایک فکری دعوت ہے کہ وہ اپنی صلاحیتوں کو پہچانیں، اپنی منزل متعین کریں اور زندگی میں بلند مقاصد کے حصول کے لیے جدوجہد کریں۔ قوموں کی ترقی اسی وقت ممکن ہے جب ان کے نوجوان امید، خودداری، علم اور عمل کے زیور سے آراستہ ہوں۔ آئیے! ہم اقبالؒ کے پیغام کو اپنی زندگی کا حصہ بنائیں اور شاہین کی طرح بلند پروازی کا عزم کریں۔

Read More

مولانا رومؒ کے اولیاء اللہ کی صحبت اور پیرِ کامل کے بارے میں ایمان افروز اشعار مع اردو ترجمہ

 

یک زمانے صحبت با اولیا

بہتر از صد سالہ طاعت بے ریا

کسی اللہ والے کی صحبت میں ایک لمحہ بیٹھنا سو سالہ مقبول عبادت سے بہتر ہے

اولیاء را ہست قدرت از الہ

تیر جستہ باز گردانند راہ

اللہ والوں کو اللہ کی طرف سے وہ طاقت حاصل ہے کہ چلائے ہوئے تیر کو راستے سے واپس کر دیتے ہیں

فیضِ حق اندر کمالِ اولیاء

نورِ حق اندر جمالِ اولیاء

اللہ والوں کے کمال میں اللہ کا فیض جاری ہے، اللہ والوں کے جمال میں نور چمکتا ہے

ہر کہ خواہدہم نشینی باخدا

او نشیند در حضورِ اولیاء

جو یہ چاہے کہ خدا کا قرب حاصل کرے، کہو اس سے کہ اللہ والوں کی غلامی میں بیٹھے

چوں شوی دور از حضورِ اولیا

در حقیقت گشتہ دور از خدا

جو کوئی اللہ والوں سے دوری رکھتا ہے، حقیقت میں وہ خدا سے دور ہو گیا ہے

پیرِ کامل صورتِ ظلِ خدا

یعنی دیدِ پیر دیدِ کبریا

پیرِ کامل خدا کے سائے کی طرح ہے، یعنی پیر کا دیکھنا خدا کا دیدار ہے

ہر کہ پیر و ذاتِ حق را یک ندید

نے مرید و نے مرید و نے مرید

جو کوئی پیر و حق کو اور خدا کو ایک نہ سمجھے، وہ مرید نہیں وہ مرید نہیں وہ مرید نہیں

 

مولانا رومؒ کے اولیاء اللہ کی صحبت، پیرِ کامل، قربِ الٰہی اور فیضِ اولیاء کے موضوع پر ایمان افروز فارسی اشعار، خوبصورت اردو ترجمہ اور روحانی تعلیمات

Read More

اطاعتِ رسول ﷺ: قرآن و سنت کی روشنی میں اہمیت، فضائل اور عصرِ حاضر میں عملی تقاضے

اطاعتِ رسول ﷺ : قرآن و سنت کی روشنی میں اطاعتِ رسول ﷺ کا مقام، اہمیت اور عصرِ حاضر میں اس کے عملی تقاضے

(اس مضمون میں درج ذیل عنوانات کا مطالعہ کریں گے)

اطاعتِ رسول ﷺ درحقیقت اللہ تعالیٰ کی اطاعت ہے

اطاعتِ رسول ﷺ ہدایت کی سند ہے

اطاعتِ رسول ﷺ رحمت کے حصول کا ذریعہ ہے

اطاعتِ رسول ﷺ عظیم کامیابی کی سند ہے

اطاعتِ رسول ﷺ جنت میں داخلے کا ذریعہ ہے

اطاعتِ رسول ﷺ اللہ تعالیٰ کی محبت حاصل کرنے کی علامت ہے

اطاعتِ رسول ﷺ گناہوں کی بخشش کا ذریعہ ہے

 اطاعتِ رسول ﷺ ایمان کی علامت اور تقاضا ہے

اطاعتِ رسول ﷺ انبیاء، صدیقین اور صالحین کی معیت کا ذریعہ ہے

اطاعتِ رسول ﷺ کے چند بنیادی عملی تقاضے

اطاعتِ رسول ﷺ اور عصرِ حاضر کے چند اہم چیلنجز

           اسلام محض چند عقائد اور عبادات کا نام نہیں بلکہ یہ اللہ تعالیٰ کی مکمل اطاعت اور اس کے رسول حضرت محمد مصطفیٰ ﷺ کی پیروی کا نام ہے۔ اللہ تعالیٰ نے انسانیت کی رہنمائی کے لیے انبیائے کرام علیہم السلام کو مبعوث فرمایا اور ان کی اطاعت کو اپنی اطاعت قرار دیا۔ سلسلۂ نبوت کے آخری نبی حضرت محمد رسول اللہ ﷺ ہیں، جن کی بعثت قیامت تک آنے والے تمام انسانوں کے لیے ہدایت اور رہنمائی کا سرچشمہ ہے۔ قرآنِ کریم میں اللہ تعالیٰ نے متعدد مقامات پر اپنی اطاعت کے ساتھ رسول اللہ ﷺ کی اطاعت کا حکم دیا ہے۔ اس سے واضح ہوتا ہے کہ رسول اللہ ﷺ کی اطاعت کوئی اختیاری یا ثانوی معاملہ نہیں بلکہ ایمان کا بنیادی تقاضا ہے۔ اللہ تعالیٰ کی معرفت، اس کی محبت، اس کی رضا، ہدایت، مغفرت اور کامیابی کے حصول کا راستہ رسول اللہ ﷺ کی پیروی سے وابستہ ہے۔ رسول اللہ ﷺ کی اطاعت کا مطلب یہ ہے کہ آپ ﷺ کے احکام کو تسلیم کیا جائے، آپ ﷺ کی سنت کو زندگی میں نافذ کیا جائے، آپ ﷺ کے اخلاق و کردار کو اپنایا جائے، آپ ﷺ کے فیصلوں کو دل سے قبول کیا جائے اور زندگی کے تمام معاملات میں آپ ﷺ کی تعلیمات کو رہنما اصول بنایا جائے۔ قرآنِ کریم نے اطاعتِ رسول ﷺ کے مختلف ثمرات اور نتائج بیان کیے ہیں۔ ان میں اللہ تعالیٰ کی اطاعت، ہدایت، رحمت، کامیابی، جنت، اللہ کی محبت، گناہوں کی بخشش، ایمان کی تکمیل اور انبیاء و صدیقین کی معیت شامل ہیں۔ ذیل میں ان تمام پہلوؤں کا قرآن و سنت کی روشنی میں جائزہ پیش کیا جاتا ہے۔

1۔ اطاعتِ رسول ﷺ درحقیقت اللہ تعالیٰ کی اطاعت ہے: اللہ تعالیٰ نے رسول اللہ ﷺ کی اطاعت کو اپنی اطاعت قرار دیتے ہوئے ارشاد فرمایا: مَنْ یُّطِعِ الرَّسُوْلَ فَقَدْ اَطَاعَ اللّٰهَۚ-وَ مَنْ تَوَلّٰى فَمَاۤ اَرْسَلْنٰكَ عَلَیْهِمْ حَفِیْظًا (سورۃ النساء: 80)ترجمہ : اور جس نے رسول کی اطاعت کی، اس نے یقیناً اللہ کی اطاعت کی، اور جو منہ موڑ لے تو ہم نے آپ کو ان پر نگہبان بنا کر نہیں بھیجا۔  اس آیتِ مبارکہ میں اللہ تعالیٰ نے ایک انتہائی بنیادی اصول بیان فرمایا ہے کہ رسول اللہ ﷺ کی اطاعت اور اللہ تعالیٰ کی اطاعت الگ الگ راستے نہیں ہیں۔ رسول اللہ ﷺ کی اطاعت درحقیقت اللہ تعالیٰ ہی کی اطاعت ہے، کیونکہ آپ ﷺ اللہ تعالیٰ کے پیغمبر اور اس کے احکام پہنچانے والے ہیں۔ حضرت ابو ہریرہ رضی اللہ عنہ سے روایت ہے کہ رسول اللہ ﷺ نے ارشاد فرمایا: مَنْ اَطَاعَنِي فَقَدْ اَطَاعَ اللّٰهَ، وَمَنْ عَصَانِي فَقَدْ عَصَى اللّٰهَ، وَمَنْ اَطَاعَ الْاَمِيرَ فَقَدْ اَطَاعَنِي، وَمَنْ عَصَى الْاَمِيرَ فَقَدْ عَصَانِي ۔ترجمہ: جس نے میری اطاعت کی، اس نے اللہ کی اطاعت کی، اور جس نے میری نافرمانی کی، اس نے اللہ کی نافرمانی کی۔ جس نے امیر کی اطاعت کی، اس نے میری اطاعت کی، اور جس نے امیر کی نافرمانی کی، اس نے میری نافرمانی کی۔ (صحیح البخاری: 7137)

حاصلِ کلام اور عصرِ حاضر کے لیے رہنمائی: اس آیت اور حدیث سے معلوم ہوتا ہے کہ رسول اللہ ﷺ کی اطاعت کو اللہ تعالیٰ کی اطاعت سے جدا نہیں کیا جا سکتا۔ آج بعض لوگ اللہ تعالیٰ پر ایمان کا دعویٰ تو کرتے ہیں لیکن جب رسول اللہ ﷺ کی سنت اور احکامات پر عمل کرنے کی بات آتی ہے تو اپنی خواہشات، معاشرتی روایات اور ذاتی پسند کو ترجیح دیتے ہیں۔ ایک مسلمان کے لیے ضروری ہے کہ وہ اپنی زندگی کے تمام شعبوں میں رسول اللہ ﷺ کی تعلیمات کو بنیادی اہمیت دے۔ عبادات، معاملات، تجارت، اخلاق، خاندانی زندگی، معاشرت اور اجتماعی معاملات میں آپ ﷺ کی رہنمائی کو اختیار کرے۔ یہ بھی سمجھنا ضروری ہے کہ رسول اللہ ﷺ کی اطاعت کا مطلب صرف زبانی محبت کا اظہار نہیں بلکہ عملی زندگی میں آپ ﷺ کے احکام کو تسلیم کرنا ہے۔

2۔ اطاعتِ رسول ﷺ ہدایت کی سند ہے:  اللہ تعالیٰ نے رسول اللہ ﷺ کی اطاعت کو ہدایت حاصل کرنے کا ذریعہ قرار دیتے ہوئے ارشاد فرمایا: قُلْ اَطِیْعُوا اللّٰهَ وَ اَطِیْعُوا الرَّسُوْلَۚ-فَاِنْ تَوَلَّوْا فَاِنَّمَا عَلَیْهِ مَا حُمِّلَ وَ عَلَیْكُمْ مَّا حُمِّلْتُمْؕ-وَ اِنْ تُطِیْعُوْهُ تَهْتَدُوْا( سورۃ النور: 54) ترجمہ: آپ فرما دیجیے کہ اللہ کی اطاعت کرو اور رسول کی اطاعت کرو، پھر اگر تم منہ موڑو تو رسول کے ذمے وہی ہے جو ان پر ذمہ داری ڈالی گئی ہے اور تمہارے ذمے وہ ہے جو تم پر ذمہ داری ڈالی گئی ہے، اور اگر تم ان کی اطاعت کرو گے تو ہدایت پا جاؤ گے، اور رسول کے ذمے تو صرف واضح طور پر پیغام پہنچا دینا ہے۔  اس آیت میں اللہ تعالیٰ نے واضح فرمایا کہ حقیقی ہدایت رسول اللہ ﷺ کی اطاعت میں ہے۔ انسان اپنی عقل، تجربے اور مشاہدے سے بہت کچھ سیکھ سکتا ہے، لیکن زندگی کے تمام معاملات میں کامل اور متوازن رہنمائی کے لیے وحی الٰہی اور تعلیماتِ نبوی ﷺ کی ضرورت ہے۔ رسول اللہ ﷺ نے ارشاد فرمایا: فَاِنَّهُ مَنْ يَعِشْ مِنْكُمْ بَعْدِي فَسَيَرَى اخْتِلَافًا كَثِيرًا، فَعَلَيْكُمْ بِسُنَّتِي وَسُنَّةِ الْخُلَفَاءِ الرَّاشِدِينَ الْمَهْدِيِّينَ، عَضُّوا عَلَيْهَا بِالنَّوَاجِذِ  (سنن ابی داؤد، حدیث: 4607) ۔ترجمہ: تم میں سے جو میرے بعد زندہ رہے گا، وہ بہت زیادہ اختلاف دیکھے گا، لہٰذا تم پر لازم ہے کہ میری سنت اور ہدایت یافتہ خلفائے راشدین کی سنت کو مضبوطی سے تھامے رکھو، اسے اپنی داڑھوں سے مضبوط پکڑ لو۔

حاصلِ کلام اور عصرِ حاضر کے لیے رہنمائی:  آج کا دور فکری انتشار، نظریاتی اختلافات اور مختلف فلسفوں کا دور ہے۔ ہر شخص اپنی سوچ، پسند اور نظریے کو درست ثابت کرنے کی کوشش کرتا ہے۔ ایسے حالات میں ایک مسلمان کے لیے سب سے محفوظ راستہ رسول اللہ ﷺ کی سنت کو مضبوطی سے تھامنا ہے۔ آج ہمیں اپنی زندگی کا جائزہ لینا چاہیے کہ ہمارے فیصلوں کی بنیاد قرآن و سنت ہیں یا معاشرتی دباؤ، رسم و رواج، ذاتی خواہشات اور وقتی مفادات؟ خصوصاً نوجوان نسل کو یہ سمجھانے کی ضرورت ہے کہ جدید تعلیم، سائنسی ترقی اور دنیاوی مہارتیں حاصل کرنا منع نہیں، لیکن زندگی کے بنیادی اخلاقی اور روحانی اصولوں کے لیے رسول اللہ ﷺ کی تعلیمات ہی ہماری رہنمائی کا معیار ہیں۔

3۔ اطاعتِ رسول ﷺ رحمت کے حصول کا ذریعہ ہے: اللہ تعالیٰ نے رسول اللہ ﷺ کی اطاعت کو اپنی رحمت کے حصول کا ذریعہ قرار دیتے ہوئے ارشاد فرمایا: وَ اَطِیْعُوا اللّٰهَ وَ الرَّسُوْلَ لَعَلَّكُمْ تُرْحَمُوْنَ( سورۃ آل عمران: 132) ترجمہ: اور اللہ اور رسول کی اطاعت کرو تاکہ تم پر رحم کیا جائے۔  اس آیت میں اللہ تعالیٰ نے اپنی رحمت کے حصول کے لیے اللہ اور اس کے رسول ﷺ کی اطاعت کا حکم دیا ہے۔ اللہ تعالیٰ کی رحمت انسان کی دنیاوی اور اخروی کامیابی کا بنیادی ذریعہ ہے۔ اس رحمت کے حصول کے لیے ضروری ہے کہ انسان اپنی زندگی کو اللہ تعالیٰ اور رسول اللہ ﷺ کے احکامات کے مطابق ڈھالے۔ حضرت ابو ہریرہ رضی اللہ عنہ سے روایت ہے کہ رسول اللہ ﷺ نے ارشاد فرمایا: كُلُّ اُمَّتِي يَدْخُلُونَ الْجَنَّةَ اِلَّا مَنْ اَبَى، قَالُوا: يَا رَسُولَ اللّٰهِ، وَمَنْ يَأْبَى؟ قَالَ: مَنْ اَطَاعَنِي دَخَلَ الْجَنَّةَ، وَمَنْ عَصَانِي فَقَدْ اَبَى (صحیح البخاری: 7280) ترجمہ: میری امت کے تمام لوگ جنت میں داخل ہوں گے سوائے اس شخص کے جس نے انکار کیا۔ صحابہ کرام رضی اللہ عنہم نے عرض کیا: یا رسول اللہ! انکار کون کرے گا؟ آپ ﷺ نے فرمایا: جس نے میری اطاعت کی وہ جنت میں داخل ہوگا اور جس نے میری نافرمانی کی، اس نے گویا انکار کیا۔

حاصلِ کلام اور عصرِ حاضر کے لیے رہنمائی:  رسول اللہ ﷺ کی اطاعت انسان کو اللہ تعالیٰ کی رحمت کے قریب کرتی ہے۔ آج ہمارے معاشرے میں بے شمار اخلاقی اور معاشرتی مسائل موجود ہیں، مثلاً ظلم، دھوکا دہی، جھوٹ، بددیانتی، قطع رحمی، حسد، بغض اور دوسروں کے حقوق کی پامالی۔ اگر ہم رسول اللہ ﷺ کی تعلیمات کو اپنی عملی زندگی میں نافذ کریں تو یہ مسائل بڑی حد تک ختم ہو سکتے ہیں۔ رسول اللہ ﷺ نے ہمیں صرف عبادات ہی نہیں سکھائیں بلکہ ایک دوسرے کے ساتھ حسنِ سلوک، معافی، درگزر، عدل، احسان اور رحم دلی کا درس بھی دیا ہے۔ لہٰذا رحمتِ الٰہی کا طالب وہی شخص ہے جو رسول اللہ ﷺ کی تعلیمات کو اپنی انفرادی اور اجتماعی زندگی کا حصہ بنائے۔

4۔ اطاعتِ رسول ﷺ عظیم کامیابی کی سند ہے : اللہ تعالیٰ نے اطاعتِ رسول ﷺ کو حقیقی اور عظیم کامیابی کا ذریعہ قرار دیتے ہوئے ارشاد فرمایا: وَ مَنْ یُّطِعِ اللّٰهَ وَ رَسُوْلَهٗ وَ یَخْشَ اللّٰهَ وَ یَتَّقْهِ فَاُولٰٓىٕكَ هُمُ الْفَآىٕزُوْنَ  ( سورۃ النور: 52) ترجمہ: اور جو اللہ اور اس کے رسول کی اطاعت کرے، اللہ سے ڈرے اور اس کی نافرمانی سے بچے، تو یہی لوگ کامیاب ہونے والے ہیں۔ ایک دوسرے مقام پر ارشاد فرمایا: وَ مَنْ یُّطِعِ اللّٰهَ وَ رَسُوْلَهٗ فَقَدْ فَازَ فَوْزًا عَظِیْمًا   ( سورۃ الأحزاب: 71)ترجمہ:  اور جو اللہ اور اس کے رسول کی اطاعت کرے، تو یقیناً اس نے بہت بڑی کامیابی حاصل کر لی۔ ان آیات سے معلوم ہوتا ہے کہ حقیقی کامیابی محض دنیاوی مال و دولت، عہدے، شہرت اور منصب کا نام نہیں بلکہ اصل کامیابی اللہ تعالیٰ کی رضا اور آخرت میں سرخروئی حاصل کرنا ہے۔ حدیثِ مبارکہ: حضرت انس بن مالک رضی اللہ عنہ سے روایت ہے کہ ایک شخص نے رسول اللہ ﷺ سے قیامت کے بارے میں سوال کیا۔ اس نے پوچھا: قیامت کب آئے گی؟ آپ ﷺ نے فرمایا: مَا اَعْدَدْتَ لَهَا؟ تم نے اس کے لیے کیا تیاری کی ہے؟ اس نے عرض کیا: میں نے اللہ اور اس کے رسول کی محبت کے علاوہ کوئی بہت زیادہ نماز اور روزے تیار نہیں کیے۔ آپ ﷺ نے فرمایا: اَنْتَ مَعَ مَنْ اَحْبَبْتَ تم اسی کے ساتھ ہوگے جس سے تم محبت کرتے ہو۔ حضرت انس رضی اللہ عنہ فرماتے ہیں کہ ہمیں رسول اللہ ﷺ کے اس فرمان سے جتنی خوشی ہوئی، کسی اور چیز سے اتنی خوشی نہیں ہوئی۔ (صحیح البخاری، حدیث: 3688؛ صحیح مسلم، حدیث: 2639) حاصلِ کلام اور عصرِ حاضر کے لیے رہنمائی:  آج کامیابی کا معیار صرف دنیاوی ترقی، دولت، شہرت اور مادی آسائشوں کو سمجھ لیا گیا ہے، حالانکہ قرآن و سنت کے مطابق کامیابی کا اصل معیار اللہ تعالیٰ اور اس کے رسول ﷺ کی اطاعت ہے۔ اس حدیث سے یہ بھی معلوم ہوتا ہے کہ رسول اللہ ﷺ سے سچی محبت انسان کو آپ ﷺ کی معیت کا مستحق بناتی ہے۔ البتہ اس محبت کا تقاضا یہ ہے کہ انسان آپ ﷺ کی تعلیمات کی پیروی بھی کرے۔ ہمیں اپنی زندگی کے اہداف متعین کرتے ہوئے یہ دیکھنا چاہیے کہ ہماری کوششیں صرف دنیا کی کامیابی کے لیے ہیں یا آخرت کی کامیابی بھی ہماری ترجیحات میں شامل ہے۔

5۔ اطاعتِ رسول ﷺ جنت میں داخلے کا ذریعہ ہے:  اللہ تعالیٰ نے اطاعتِ رسول ﷺ کو جنت میں داخلے کا سبب قرار دیتے ہوئے ارشاد فرمایا: وَ  مَنْ  یُّطِعِ  اللّٰهَ  وَ  رَسُوْلَهٗ  یُدْخِلْهُ  جَنّٰتٍ  تَجْرِیْ  مِنْ  تَحْتِهَا  الْاَنْهٰرُ  خٰلِدِیْنَ  فِیْهَا وَ  ذٰلِكَ  الْفَوْزُ  الْعَظِیْمُ  ( سورۃ النساء: 13) ترجمہ: اور جو اللہ اور اس کے رسول کی اطاعت کرے گا، اللہ اسے ایسے باغات میں داخل فرمائے گا جن کے نیچے نہریں بہتی ہوں گی، وہ ان میں ہمیشہ رہیں گے، اور یہی بہت بڑی کامیابی ہے۔  اس آیت میں اللہ تعالیٰ نے واضح فرمایا کہ جنت کا راستہ اللہ اور اس کے رسول ﷺ کی اطاعت سے وابستہ ہے۔ جنت محض دعووں، خواہشات اور تمناؤں سے حاصل نہیں ہوتی بلکہ اس کے لیے ایمان، نیک اعمال اور اللہ و رسول کی اطاعت ضروری ہے۔ حدیثِ مبارکہ:  رسول اللہ ﷺ نے ارشاد فرمایا: مَنْ اَطَاعَنِي دَخَلَ الْجَنَّةَ، وَمَنْ عَصَانِي فَقَدْ اَبَى  ترجمہ: جس نے میری اطاعت کی وہ جنت میں داخل ہوگا، اور جس نے میری نافرمانی کی اس نے گویا انکار کیا۔ (صحیح البخاری، حدیث: 7280) ایک اور حدیث میں رسول اللہ ﷺ نے ارشاد فرمایا: اِذَا اُمِرْتُكُمْ بِاَمْرٍ فَأْتُوا مِنْهُ مَا اسْتَطَعْتُمْ  ترجمہ: جب میں تمہیں کسی کام کا حکم دوں تو اپنی استطاعت کے مطابق اس پر عمل کرو۔ (صحیح البخاری، حدیث: 7288؛ صحیح مسلم، حدیث: 1337)

حاصلِ کلام اور عصرِ حاضر کے لیے رہنمائی:  اس سے معلوم ہوتا ہے کہ جنت کے حصول کے لیے رسول اللہ ﷺ کی تعلیمات کو اپنی زندگی میں نافذ کرنا ضروری ہے۔ آج بعض لوگ جنت کی امید تو رکھتے ہیں لیکن اپنی زندگی میں سنتِ نبوی ﷺ کو اہمیت نہیں دیتے۔ نماز، روزہ، زکوٰۃ، حقوق العباد، حلال و حرام، معاملات اور اخلاق کے حوالے سے رسول اللہ ﷺ کی تعلیمات کو نظر انداز کر دیتے ہیں۔ ہمیں یہ سمجھنا چاہیے کہ جنت کا راستہ رسول اللہ ﷺ کی پیروی سے ہو کر گزرتا ہے۔ اس کے ساتھ یہ حقیقت بھی پیش نظر رہے کہ انسان اپنے اعمال کے بل پر نہیں بلکہ اللہ تعالیٰ کی رحمت سے جنت میں داخل ہوگا، جبکہ اطاعت اور نیک اعمال اس رحمت کے حصول کے اسباب ہیں۔

6۔ اطاعتِ رسول ﷺ اللہ تعالیٰ کی محبت حاصل کرنے کی علامت ہے:  اللہ تعالیٰ نے اپنی محبت کے دعوے کو رسول اللہ ﷺ کی اتباع کے ساتھ مشروط کرتے ہوئے ارشاد فرمایا: قُلْ اِنْ كُنْتُمْ تُحِبُّوْنَ اللّٰهَ فَاتَّبِعُوْنِیْ یُحْبِبْكُمُ اللّٰهُ وَ یَغْفِرْ لَكُمْ ذُنُوْبَكُمْ۔ وَ اللّٰهُ غَفُوْرٌ رَّحِیْمٌ ( سورۃ آل عمران: 31)ترجمہ:  آپ فرما دیجیے: اگر تم اللہ سے محبت کرتے ہو تو میری پیروی کرو، اللہ تم سے محبت کرنے لگے گا اور تمہارے گناہ بخش دے گا، اور اللہ بہت بخشنے والا، نہایت مہربان ہے۔  یہ آیت اطاعتِ رسول ﷺ کے موضوع پر نہایت بنیادی اور جامع آیت ہے۔ اس میں اللہ تعالیٰ نے محبتِ الٰہی کا معیار بیان فرمایا ہے۔ اللہ تعالیٰ سے محبت کا دعویٰ کرنے والے شخص کے لیے ضروری ہے کہ وہ رسول اللہ ﷺ کی اتباع کرے۔ محض زبانی دعویٰ کافی نہیں بلکہ محبت کا حقیقی ثبوت محبوب کی پیروی ہے۔ حدیثِ مبارکہ:  حضرت انس بن مالک رضی اللہ عنہ سے روایت ہے کہ رسول اللہ ﷺ نے ارشاد فرمایا: لَا يُؤْمِنُ اَحَدُكُمْ حَتَّى اَكُونَ اَحَبَّ اِلَيْهِ مِنْ وَالِدِهِ وَوَلَدِهِ وَالنَّاسِ اَجْمَعِينَ ۔ترجمہ: تم میں سے کوئی شخص اس وقت تک کامل مؤمن نہیں ہو سکتا جب تک میں اسے اس کے والد، اس کی اولاد اور تمام لوگوں سے زیادہ محبوب نہ ہو جاؤں۔ (صحیح البخاری، حدیث: 15؛ صحیح مسلم، حدیث: 44)

حاصلِ کلام اور عصرِ حاضر کے لیے رہنمائی: آج رسول اللہ ﷺ سے محبت کا اظہار مختلف انداز میں کیا جاتا ہے۔ نعت خوانی، درود و سلام، محافلِ میلاد اور سیرت النبی ﷺ کے اجتماعات محبت کے اظہار کے مختلف ذرائع ہیں، لیکن قرآنِ کریم نے محبت کا بنیادی معیار اتباعِ رسول ﷺ قرار دیا ہے۔ ہمیں اپنے طرزِ زندگی کا جائزہ لینا چاہیے: - کیا ہماری نماز رسول اللہ ﷺ کے طریقے کے مطابق ہے؟ - کیا ہمارے معاملات میں آپ ﷺ کی تعلیمات کی جھلک موجود ہے؟ - کیا ہم سچ بولتے، وعدہ پورا کرتے اور امانت کی حفاظت کرتے ہیں؟ - کیا ہم اپنے والدین، بیوی بچوں، پڑوسیوں اور ماتحتوں کے حقوق ادا کرتے ہیں؟ - کیا ہم اپنی خواہشات کے مقابلے میں سنتِ رسول ﷺ کو ترجیح دیتے ہیں؟ اگر ہم واقعی اللہ تعالیٰ سے محبت کرتے ہیں تو ہمیں رسول اللہ ﷺ کی سیرت و سنت کو اپنی زندگی کا عملی نمونہ بنانا ہوگا۔

7۔ اطاعتِ رسول ﷺ گناہوں کی بخشش کا ذریعہ ہے:  اللہ تعالیٰ نے اسی آیتِ مبارکہ میں رسول اللہ ﷺ کی اتباع کے نتیجے میں گناہوں کی بخشش کی خوش خبری بھی عطا فرمائی: قُلْ اِنْ كُنْتُمْ تُحِبُّوْنَ اللّٰهَ فَاتَّبِعُوْنِیْ یُحْبِبْكُمُ اللّٰهُ وَ یَغْفِرْ لَكُمْ ذُنُوْبَكُمْ۔ وَ اللّٰهُ غَفُوْرٌ رَّحِیْمٌ ( سورۃ آل عمران: 31)ترجمہ:  آپ فرما دیجیے: اگر تم اللہ سے محبت کرتے ہو تو میری پیروی کرو، اللہ تم سے محبت کرنے لگے گا اور تمہارے گناہ بخش دے گا، اور اللہ بہت بخشنے والا، نہایت مہربان ہے۔  اس آیت میں دو عظیم انعامات کا ذکر ہے: 1. اللہ تعالیٰ کی محبت کا حصول۔ 2. گناہوں کی مغفرت۔ یہ دونوں انعامات اتباعِ رسول ﷺ کے ساتھ وابستہ کیے گئے ہیں۔ حدیثِ مبارکہ: حضرت عمر بن خطاب رضی اللہ عنہ سے روایت ہے کہ رسول اللہ ﷺ نے ارشاد فرمایا: مَا مِنْكُمْ مِنْ اَحَدٍ يَتَوَضَّاُ فَيُبْلِغُ ـ اَوْ فَيُسْبِغُ ـ الْوُضُوءَ، ثُمَّ يَقُولُ: اَشْهَدُ اَنْ لَا اِلٰهَ اِلَّا اللّٰهُ، وَاَنَّ مُحَمَّدًا عَبْدُ اللّٰهِ وَرَسُولُهٗ، اِلَّا فُتِحَتْ لَهٗ اَبْوَابُ الْجَنَّةِ الثَّمَانِيَةُ يَدْخُلُ مِنْ اَيِّهَا شَاءَ ۔ترجمہ: تم میں سے جو شخص اچھی طرح وضو کرے، پھر یہ کہے کہ میں گواہی دیتا ہوں کہ اللہ کے سوا کوئی معبود نہیں اور محمد ﷺ اللہ کے بندے اور رسول ہیں، تو اس کے لیے جنت کے آٹھوں دروازے کھول دیے جاتے ہیں، وہ جس دروازے سے چاہے داخل ہو۔ (صحیح مسلم، حدیث: 234)

حاصلِ کلام اور عصرِ حاضر کے لیے رہنمائی: انسان خطا کا پتلا ہے۔ اس سے زندگی میں غلطیاں اور گناہ سرزد ہو سکتے ہیں، لیکن اللہ تعالیٰ نے توبہ، استغفار اور نیک اعمال کے ذریعے مغفرت کے دروازے کھول رکھے ہیں۔ رسول اللہ ﷺ کی اتباع انسان کو ایسے اعمال کی طرف رہنمائی کرتی ہے جو اللہ تعالیٰ کی مغفرت کا سبب بنتے ہیں۔ آج ہمیں چاہیے کہ گناہوں سے بچنے کی کوشش کریں، اگر کوئی غلطی ہو جائے تو فوراً توبہ کریں، استغفار کریں اور رسول اللہ ﷺ کی سنت کے مطابق اپنی زندگی کی اصلاح کریں۔ یہ بات بھی یاد رہے کہ گناہوں کی مغفرت اللہ تعالیٰ کے فضل و رحمت سے ہوتی ہے، اس لیے اتباع کے ساتھ توبہ، اخلاص اور حقوق العباد کی ادائیگی بھی ضروری ہے۔

8۔ اطاعتِ رسول ﷺ ایمان کی علامت اور تقاضا ہے : اللہ تعالیٰ نے ایمان والوں کو اپنی اور اپنے رسول ﷺ کی اطاعت کا حکم دیتے ہوئے ارشاد فرمایا: وَ اَطِیْعُوا اللّٰهَ وَ رَسُوْلَهٗۤ اِنْ كُنْتُمْ مُّؤْمِنِیْنَ  (سورۃ الأنفال: 1) ترجمہ:   اور اللہ اور اس کے رسول کی اطاعت کرو، اگر تم مؤمن ہو۔  اس آیت سے واضح ہوتا ہے کہ ایمان کا عملی تقاضا اللہ اور اس کے رسول ﷺ کی اطاعت ہے۔ حدیثِ مبارکہ:  رسول اللہ ﷺ نے نماز کے طریقے کے بارے میں ارشاد فرمایا: صَلُّوا كَمَا رَاَيْتُمُونِي اُصَلِّي  ترجمہ: تم اسی طرح نماز پڑھو جس طرح تم نے مجھے نماز پڑھتے ہوئے دیکھا ہے۔ (صحیح البخاری، حدیث: 631) ایک اور حدیث میں حج کے مناسک کے بارے میں فرمایا: لِتَأْخُذُوا مَنَاسِكَكُمْ ۔ترجمہ: تم اپنے حج کے طریقے مجھ سے سیکھ لو۔ (صحیح مسلم، حدیث: 1297)

حاصلِ کلام اور عصرِ حاضر کے لیے رہنمائی:  ایمان صرف دل میں موجود ایک کیفیت کا نام نہیں بلکہ اس کے عملی تقاضے بھی ہیں۔ ایک مؤمن کی پہچان یہ ہے کہ وہ اللہ اور اس کے رسول ﷺ کے احکامات کو خوش دلی سے قبول کرتا ہے۔ نماز، روزہ، حج، زکوٰۃ، نکاح، طلاق، خرید و فروخت، وراثت اور معاشرتی معاملات میں رسول اللہ ﷺ کی تعلیمات ہمارے لیے عملی رہنمائی فراہم کرتی ہیں۔ آج ہمیں عبادات میں اپنی پسند کے بجائے سنتِ رسول ﷺ کو معیار بنانا چاہیے۔ نماز کے طریقے، وضو کے آداب اور حج کے مناسک کو مستند احادیث کی روشنی میں سیکھنا اور سکھانا چاہیے۔ اسی طرح اپنے اخلاق و معاملات میں بھی ایمان کے تقاضوں کو پورا کرنا چاہیے۔

9۔ اطاعتِ رسول ﷺ انبیاء، صدیقین اور صالحین کی معیت کا ذریعہ ہے : اللہ تعالیٰ نے رسول اللہ ﷺ کی اطاعت کرنے والوں کے لیے قیامت کے دن انبیاء، صدیقین، شہداء اور صالحین کی معیت کی خوش خبری سنائی ہے۔ اللہ تعالیٰ کا ارشاد ہے:  وَ مَنْ یُّطِعِ اللّٰهَ وَ الرَّسُوْلَ فَاُولٰٓىٕكَ مَعَ الَّذِیْنَ اَنْعَمَ اللّٰهُ عَلَیْهِمْ مِّنَ النَّبِیّٖنَ وَ الصِّدِّیْقِیْنَ وَ الشُّهَدَآءِ وَ الصّٰلِحِیْنَۚ-وَ حَسُنَ اُولٰٓىٕكَ رَفِیْقًا  ( سورۃ النساء: 69) ترجمہ:  اور جو اللہ اور رسول کی اطاعت کرے گا، تو ایسے لوگ ان ہستیوں کے ساتھ ہوں گے جن پر اللہ نے انعام فرمایا ہے، یعنی انبیاء، صدیقین، شہداء اور صالحین، اور یہ کتنے اچھے ساتھی ہیں۔ یہ آیت اطاعتِ رسول ﷺ کے عظیم ثمرات میں سے ایک ثمرہ بیان کرتی ہے۔ دنیا میں انسان جس سے محبت کرتا ہے اور جس کے راستے پر چلتا ہے، آخرت میں بھی اسی کے ساتھ ہونے کی امید رکھتا ہے۔ حدیثِ مبارکہ:  حضرت انس بن مالک رضی اللہ عنہ سے روایت ہے کہ ایک شخص نے رسول اللہ ﷺ سے قیامت کے بارے میں سوال کیا اور پھر عرض کیا کہ قیامت کے لیے میرے پاس بہت زیادہ نیک اعمال نہیں، البتہ میں اللہ اور اس کے رسول سے محبت کرتا ہوں۔ رسول اللہ ﷺ نے فرمایا: اَنْتَ مَعَ مَنْ اَحْبَبْتَ ۔ترجمہ:  تم اسی کے ساتھ ہوگے جس سے تم محبت کرتے ہو۔ (صحیح البخاری، حدیث: 3688؛ صحیح مسلم، حدیث: 2639)

حاصلِ کلام اور عصرِ حاضر کے لیے رہنمائی:  یہ آیت اور حدیث ہر مسلمان کے لیے امید اور بشارت کا پیغام ہیں۔ رسول اللہ ﷺ سے محبت، آپ ﷺ کی اطاعت اور آپ ﷺ کے نقشِ قدم پر چلنا انسان کو قیامت کے دن عظیم ہستیوں کی معیت کا مستحق بناتا ہے۔ آج ہمیں اپنی نسلوں کی تربیت اس انداز سے کرنی چاہیے کہ ان کے دلوں میں رسول اللہ ﷺ کی محبت پیدا ہو اور وہ آپ ﷺ کی سیرت کو اپنی زندگی کے لیے نمونہ بنائیں۔ صرف رسول اللہ ﷺ کے نام سے محبت کا اظہار کافی نہیں بلکہ آپ ﷺ کے اخلاق، عبادات، معاملات، عادات اور تعلیمات کو اپنانا بھی ضروری ہے۔

اطاعتِ رسول ﷺ کے چند بنیادی عملی تقاضے:  قرآن و سنت کی مذکورہ تعلیمات سے یہ بات واضح ہوتی ہے کہ اطاعتِ رسول ﷺ زندگی کے کسی ایک شعبے تک محدود نہیں بلکہ یہ ایک مسلمان کی پوری زندگی کا احاطہ کرتی ہے۔ عصرِ حاضر میں اطاعتِ رسول ﷺ کے چند اہم عملی تقاضے درج ذیل ہیں:

1۔ عبادات میں اتباعِ سنت نماز، روزہ، زکوٰۃ، حج، وضو، ذکر و اذکار اور دیگر عبادات کو رسول اللہ ﷺ کی تعلیمات کے مطابق ادا کیا جائے۔ عبادات میں اپنی طرف سے طریقے ایجاد کرنے کے بجائے سنتِ نبوی ﷺ کو معیار بنایا جائے۔

2۔ اخلاق و کردار میں اتباعِ رسول ﷺ رسول اللہ ﷺ کے اخلاقِ کریمانہ کو اپنایا جائے۔ سچائی، امانت، وعدے کی پابندی، عفو و درگزر، رحم دلی، تواضع اور حسنِ معاشرت کو اپنی زندگی کا حصہ بنایا جائے۔

3۔ خاندانی زندگی میں اتباعِ رسول ﷺ والدین کے ساتھ حسنِ سلوک، بیوی بچوں کے حقوق کی ادائیگی، رشتہ داروں کے ساتھ صلہ رحمی اور گھر کے تمام افراد کے ساتھ محبت و شفقت کا معاملہ کیا جائے۔

4۔ معاشی معاملات میں اتباعِ رسول ﷺ تجارت اور کاروبار میں جھوٹ، دھوکا، ملاوٹ، سود، ناجائز منافع خوری اور ناپ تول میں کمی سے بچا جائے۔ حلال روزی کو ترجیح دی جائے اور لوگوں کے مالی حقوق کی حفاظت کی جائے۔

5۔ معاشرتی زندگی میں اتباعِ رسول ﷺ پڑوسیوں کے حقوق، کمزوروں کی مدد، یتیموں کی کفالت، محتاجوں کی دستگیری، بیماروں کی عیادت اور معاشرے میں امن و محبت کے فروغ کے لیے کوشش کی جائے۔

6۔ اختلافات میں اتباعِ رسول ﷺ مسلکی، فکری اور معاشرتی اختلافات کے باوجود ادب، احترام، عدل اور تحمل کا مظاہرہ کیا جائے۔ رسول اللہ ﷺ کی تعلیمات کے مطابق اختلاف کو دشمنی، نفرت اور انتشار کا ذریعہ نہ بنایا جائے۔

7۔ ڈیجیٹل زندگی میں اتباعِ رسول ﷺ سوشل میڈیا اور جدید ذرائع ابلاغ کے استعمال میں بھی سنتِ نبوی ﷺ کی تعلیمات کو پیش نظر رکھا جائے۔ جھوٹی خبریں پھیلانے، بہتان تراشی، غیبت، کردار کشی، تمسخر اور دوسروں کی تذلیل سے اجتناب کیا جائے۔ رسول اللہ ﷺ نے ارشاد فرمایا: مَنْ كَانَ يُؤْمِنُ بِاللّٰهِ وَالْيَوْمِ الْآخِرِ فَلْيَقُلْ خَيْرًا اَوْ لِيَصْمُتْ ۔ترجمہ:  جو شخص اللہ اور یومِ آخرت پر ایمان رکھتا ہے، اسے چاہیے کہ اچھی بات کہے یا خاموش رہے۔ (صحیح البخاری، حدیث: 6018؛ صحیح مسلم، حدیث: 47) اس حدیث کی روشنی میں سوشل میڈیا پر بھی ہر مسلمان کو اپنی زبان اور تحریر کی حفاظت کرنی چاہیے۔

اطاعتِ رسول ﷺ اور عصرِ حاضر کے چند اہم چیلنجز : موجودہ دور میں اطاعتِ رسول ﷺ کے حوالے سے بعض ایسے چیلنجز بھی سامنے آ رہے ہیں جن پر خصوصی توجہ دینے کی ضرورت ہے۔

اول: خواہشات کو شریعت پر ترجیح دینا:  بعض لوگ اپنی خواہشات اور مفادات کے مطابق دین کی تعلیمات کو قبول یا رد کرنے کی کوشش کرتے ہیں۔ حالانکہ مؤمن کا طرزِ عمل یہ ہونا چاہیے کہ وہ اپنی خواہشات کو شریعت کے تابع بنائے۔

دوم: سنتِ رسول ﷺ کو صرف عبادات تک محدود سمجھنا:  بعض اوقات سنت کو صرف نماز، روزہ اور دیگر عبادات تک محدود سمجھ لیا جاتا ہے، جبکہ رسول اللہ ﷺ کی تعلیمات ہماری خاندانی، معاشرتی، معاشی، اخلاقی اور اجتماعی زندگی کے لیے بھی رہنمائی فراہم کرتی ہیں۔

سوم: محبتِ رسول ﷺ اور اتباعِ رسول ﷺ میں عملی فاصلے: رسول اللہ ﷺ سے محبت ہر مسلمان کے ایمان کا حصہ ہے، لیکن اس محبت کا تقاضا آپ ﷺ کی اطاعت اور پیروی بھی ہے۔ ہمیں اپنی محبت کو عملی اتباع کے ذریعے ثابت کرنا چاہیے۔

چہارم: مستند دینی علم سے دوری: سوشل میڈیا کے اس دور میں غیر مستند روایات، غلط دینی معلومات اور من گھڑت احادیث تیزی سے پھیلتی ہیں۔ اس لیے ضروری ہے کہ قرآن و سنت کی تعلیمات مستند علماء اور معتبر مصادر سے حاصل کی جائیں۔

پنجم: اجتماعی زندگی میں نبوی تعلیمات کو نظر انداز کرنا:  عدل و انصاف، حقوق العباد، دیانت داری، معاشرتی ذمہ داری اور باہمی احترام رسول اللہ ﷺ کی بنیادی تعلیمات میں شامل ہیں۔ ان تعلیمات کو اجتماعی زندگی میں نافذ کیے بغیر ایک مثالی اسلامی معاشرے کا قیام ممکن نہیں۔

خلاصۂ کلام

 قرآنِ کریم کی مذکورہ آیات اور احادیثِ مبارکہ سے یہ حقیقت واضح ہوتی ہے کہ اطاعتِ رسول ﷺ ایک مسلمان کی انفرادی اور اجتماعی زندگی کا بنیادی تقاضا ہے۔ اللہ تعالیٰ نے رسول اللہ ﷺ کی اطاعت کو اپنی اطاعت قرار دیا، اسے ہدایت کا ذریعہ بتایا، اپنی رحمت کے حصول سے وابستہ کیا، عظیم کامیابی کی سند قرار دیا، جنت میں داخلے کا سبب بتایا، اپنی محبت کے حصول اور گناہوں کی مغفرت کا ذریعہ قرار دیا، ایمان کی علامت بنایا اور اس کے نتیجے میں انبیاء، صدیقین، شہداء اور صالحین کی معیت کی خوش خبری سنائی۔ یہ تمام فضائل اس بات کی دلیل ہیں کہ اطاعتِ رسول ﷺ محض ایک مذہبی شعار نہیں بلکہ ایک مسلمان کی پوری زندگی کا نظامِ عمل ہے۔ آج ہمیں اپنی زندگی کا جائزہ لینے کی ضرورت ہے کہ ہم رسول اللہ ﷺ سے محبت کے دعوے کے ساتھ آپ ﷺ کی تعلیمات پر کس حد تک عمل کر رہے ہیں؟ کیا ہماری عبادات، معاملات، اخلاق، تجارت، معاشرت اور خاندانی زندگی میں سنتِ رسول ﷺ کی جھلک موجود ہے؟ اگر ہم واقعی دنیا و آخرت کی کامیابی چاہتے ہیں تو ہمیں اپنی زندگی کے ہر شعبے میں رسول اللہ ﷺ کی تعلیمات کو رہنما بنانا ہوگا۔

اللہ تعالیٰ ہمیں قرآن و سنت کو سمجھنے، رسول اللہ ﷺ سے سچی محبت کرنے، آپ ﷺ کی اطاعت و اتباع اختیار کرنے اور آپ ﷺ کی سنت کے مطابق زندگی گزارنے کی توفیق عطا فرمائے۔

 آمین یا رب العالمین۔

تدوین و ترتیب: محمد سہیل عارف معینیؔ (پی ایچ ڈی سکالر: یونیورسٹی آف ایجوکیشن لاہور)

اطاعت رسول، اطاعت رسول کی اہمیت، اطاعت رسول قرآن و سنت کی روشنی میں، محبت رسول، اتباع رسول، سنت نبوی، سیرت النبی ﷺ، قرآن و حدیث، فضائل اطاعت رسول، حقوق رسول، Itaat e Rasool, Itaat e Rasool ki Ahmiyat, Muhabbat e Rasool, Itteba e Rasool, Sunnat e Nabawi, Quran o Sunnat, Islamic Articles Urdu

 

Read More

Online Quran Classes at Home - Book Your Free Demo Class Now

گھر بیٹھے اپنے بچوں کو قرآن پاک کی درست تجوید کے ساتھ پڑھائیں! 🌟

کیا آپ بیرونِ ملک (امریکہ، کینیڈا، یو کے، یورپ، خلیجی ممالک) یا پاکستان میں مقیم ہیں اور اپنے بچوں کے لیے ایک بہترین اور مستند قرآنی پلیٹ فارم کی تلاش میں ہیں؟

"المعین ریسرچ انسٹیٹیوٹ فار اسلامک آئیڈیالوجی"

کے تحت آن لائن قرآن کلاسز کا آغاز ہو چکا ہے، جہاں آپ کے بچے گھر بیٹھے باآسانی قرآنِ مجید کی تعلیم حاصل کر سکتے ہیں۔

✨ ہماری امتیازی خصوصیات:

 👨‍🏫 انتہائی تجربہ کار، ماہر اور تربیت یافتہ قاری حضرات اور حفاظ کرام۔

 🌍 بالخصوص بین الاقوامی (International) طلباء و طالبات کے لیے بہترین ترجیحی اوقات۔

 🇵🇰 پاکستان میں مقیم بچوں کے لیے بھی انتہائی مناسب فیس اور آسان شیڈول۔

 🎯 قاعدہ، ناظرہ، حفظِ قرآن اور تجوید و قرات کی خصوصی تربیت۔

 📚 اسلامی بنیادی تعلیمات، مسنون دعائیں اور کلمے بھی ساتھ سکھائے جاتے ہیں۔

💻 پرامن، محفوظ اور آسان آن لائن لرننگ ماحول۔

آج ہی اپنے بچوں کا مستقبل قرآن کی روشنی میں روشن کریں!

 📞 مفت ڈیمو کلاس (Free Trial Class) کے لیے آج ہی رابطہ کریں:

واٹس ایپ/رابطہ نمبر: +923005262557

ویب سائٹ:www.almoeen.org

ادارہ: المعین ریسرچ انسٹیٹیوٹ فار اسلامک آئیڈیالوجی

ہمارا مقصد: نسلِ نو کو قرآن سے جوڑنا

 

Read More