ان کا منگتا ہوں جو منگتا نہیں ہونے دیتے

ان کا منگتا ہوں جو  منگتا نہیں ہونے دیتے

یہ حوالے مجھے رسوا نہیں ہونے دیتے

میرے ہر عیب کی کرتے ہیں پردہ پوشی

میرے جرموں کا تماشہ نہیں ہونے دیتے

اپنے منگتوں کی وہ فہرست میں رکھتے ہیں سدا

مجھ کو محتاج کسی کا نہیں ہونے دیتے

بات کرتا ہوں تو آتی ہے مہک طیبہ کی

میرے لہجے کو وہ میلا نہیں ہونے دیتے

ہے یہ ایمان کہ آئیں گے لحد میں میری

اپنے منگتوں کو و ہ تنہا نہیں ہونے دیتے

آپ کی نعت سے جوبن ہے تخیل میں میرے

فکر تیرے مجھے بوڑھا نہیں ہونے دیتے

آپ کی یاد سے رہتی ہے نمی آنکھوں میں

میرے دریاؤں کو صحرا نہیں ہونے دیتے

حکم کرتے ہیں تو  ملتے ہیں مقطعے شاکرؔ

آپ نہ چاہیں تو مطلع نہیں ہونے دیتے

تنویر اللہ شاکرؔ

Read More

بے سبب بات بڑھانے کی ضرورت کیا ہے

بے سبب بات بڑھانے کی ضرورت کیا ہے

ہم خفا کب تھے منانے کی ضرورت کیا ہے

آپ کے دم سے تو دنیا کا  بھرم  ہے قائم

آپ جب ہیں تو زمانے کی ضرورت کیا ہے

تیرا کوچہ ترا در تیری گلی کافی ہے

بے ٹھکانوں کو ٹھکانے کی ضرورت کیا ہے

دل سے ملنے کی تمناہی نہیں جب دل میں

ہاتھ سے ہاتھ ملانے کی ضرورت کیا ہے

رنگ آنکھوں کیلیے بو ہے دماغوں کے لیے

پھول کو ہاتھ لگانے کی ضرورت کیا ہے

Read More

ممبروں پر بھی گنہگار نظر آتے ہیں

ممبروں پر بھی گنہگار نظر آتے ہیں

سب قیامت کے ہی آثار نظر آتے ہیں

ان مسیحاؤں سے اللہ بچائے ہم کو

شکل و صورت  سے جو بیمار نظر آتے ہیں

جانے کیا ٹوٹ گیا ہے کہ ہر اک رات میں مجھے

خواب میں گنبد  و مینار نظر آتے ہیں

مات دیتے ہیں یزیدوں کو لہو سے ہم ہی

ہم ہی نیزوں پر ہر اک بار نظر آتے ہیں

آنکھ کھولی ہے فسادات میں جن بچوں نے

ان کو خوابوں میں بھی ہتھیار نظر آتے ہیں

شکیل شمسیؔ

Read More

گنگناتے ہوئے آثار نظر آتے ہیں

گنگناتے ہوئے آثار نظر آتے ہیں

آج بدلے ہوئے سرکار نظر آتے ہیں

ہم ہمیشہ محبت میں جنون کے قائل

اور وہ مائل با انکار نظر آتے ہیں

جو مسیحائے حکومت کی خلعت پہنے ہیں

فکر اذہان سے بیمار نظر آتے ہیں

خود کش حملے ہیں دھماکے ہیں وہاں ہنگامے

سرخیِٔ خون میں اخبار نظر آتے ہیں

چھوڑ کر تنہاں جہاں سب ہی چلے جاتے ہیں

دوست  و رفقاء وہاں اغیار نظر آتے ہیں

راستہ کتنا کٹھن ہے راہ سے پوچھو  رہبرؔ

دیکھنے میں سبھی ہموار نظر آتے ہیں

سید انور ظہیر رہبرؔ

پوسٹ: محمد سہیل عارف معینیؔ

Read More

چار سو درد کے انبار نظر آتے ہیں

چار سو درد کے انبار نظر آتے ہیں

بن تیرے ہم پسِ دیوار نظر آتے ہیں

اس طرح درد دیے مجھ کو میرے اپنوں نے

سارے اپنے مجھے اغیار نظر آتے ہیں

جن کاا ک پل نہ گزرتا تھا مرے بن

جانے کیوں آج وہ اس پار نظر آتے ہیں

کوئی کیا رسم ِمسیحائی نبھائے گا یہاں

سبھی الفت کے جو بیمار نظر آتے ہیں

جن کی قسمت میں لکھا ہو غمِ الفت کا عذاب

کبھی شاعر یا وہ غمخوار نظر آتے ہیں

ان کو بھی راس محبت نہیں آئی شاید

وہ جو روتے سرِ بازار نظر آتے ہیں

کل تلک ہم بھی تھے آزاد غموں سے باقرؔ

آج سوچوں کے علمدار نظر آتے ہیں

مرید باقرؔ

پوسٹ: محمد سہیل عارف معینیؔ

Read More

راستے جو بھی چمکدار نظر آتے ہیں

راستے جو بھی چمکدار نظر آتے ہیں

سب تیری اوڑھنی کے تار نظر آتے ہیں

کوئی پاگل ہی محبت سے نوازے گا مجھے

آپ تو خیر سمجھدار نظر آتے ہیں

میں کہاں جاوں کروں کس سے شکایت اس کی

ہر طرف اس کے طرفدار نظر آتے ہیں

زخم بھرنے لگے ہیں پچھلی ملاقاتوں کے

پھر ملاقات کے آثار نظر آتے ہیں

ایک ہی بار  نظر پڑتی ہے ان پر تابشؔ

اور پھر وہی لگاتار نظر آتے ہیں

زبیر علی تابشؔ

پوسٹ: محمد سہیل عارف معینیؔ

Read More

بدلے بدلے میرے غم خوار نظر آتے ہیں

بدلے بدلے میرے غم خوار نظر آتے ہیں

مرحلے عشق کے دشوار نظر آتے ہیں

کشتیِٔ غیرت احساس سے سلامت  یا رب

آج طوفان کے آثار نطر آتے ہیں

انقلاب آیا نا جانے یہ چمن میں کیسا

غنچہ  و گل مجھے تلوار نظر آتے ہیں

جن کی آنکھوں سے چھلکتا تھا کبھی رنگِ خلوص

ان دنوں مائل ِ تکرار نظر آتے ہیں

جو سنا کرتے تھے ہس ہس کے نامۂِ شوق

اب مری شکل سے بیزار نظر آتے ہیں

ان کے آگے جو جھکی رہتی ہیں نظریں اپنی

اس لیے ہم ہی خطا وار نظرآتے ہیں

دشمن خوئے وفا رسم محبت کے حریف

وہی کیا   اور بھی دو چار نظر آتے ہیں

ہم نہ بدلے تھے نہ بدلے ہیں نہ بدلیں گے شکیلؔ

ایک ہی رنگ میں ہر بار نظر آتے ہیں

شکیلؔ بدایونی

Read More

یہ جو دیوانے سے دو چار نظر آتے ہیں

یہ جو دیوانے سے دو چار نظر آتے ہیں

ان میں کچھ صاحبِ اسرار نظر آتے ہیں 

تیری محفل کا بھرم رکھتے ہیں سو جاتے ہیں

ورنہ یہ لوگ تو بیدار نظرآتے ہیں

دور تک کوئی ستارہ ہے نہ کوئی جگنو

مرگِ امید کے آثار نظر آتے ہیں

میرے دامن میں شراروں کے سوا کچھ بھی نہیں

آپ پھولوں کے خریدار نظر آتے ہیں

کل جنہیں چھو نہیں سکتی تھی فرشتوں کی نظر

آج وہ رونقِ بازار نظر آتے ہیں

حشر میں کون گواہی میری دے گا ساغرؔ

سب تمہارے ہی طرفدار نظر آتے ہیں

پوسٹ : محمد سہیل عارف معینیؔ

Read More

رنجش ہی سہی دل ہی دکھانے کیلیے آ

رنجش ہی سہی دل ہی دکھانے کے لیے آ

آ پھر سے مجھے چھوڑ کے جانے کے لیے آ

کچھ تو مرے پندار محبت کا بھرم رکھ

تو بھی تو کبھی مجھ کو منانے کے لیے آ

پہلے سے مراسم نہ سہی پھر بھی کبھی تو

رسم و رہ دنیا ہی نبھانے کے لیے آ

کس کس کو بتائیں گے جدائی کا سبب ہم

تو مجھ سے خفا ہے تو زمانے کے لیے آ

اک عمر سے ہوں لذت گریہ سے بھی محروم

اے راحت جاں مجھ کو رلانے کے لیے آ

اب تک دل خوش فہم کو تجھ سے ہیں امیدیں

یہ آخری شمعیں بھی بجھانے کے لیے آ

Read More