عجیب درد سا اُس لمحہء وصال میں تھا || چراغ جلتے ہوئے ٹمٹما اٹھا یکدم || کچھ ایسا رنگِ تکبّر ہوا کی چال میں تھا

 

عجیب درد  سا اُس لمحہء وصال میں تھا

کہ زخم سے بھی بڑا کرب اندمال میں تھا

 

وہ ایک ساز کہ بکھرا ہوا تھا تار بہ تار

وہ ایک نغمہ کسی سر میں تھا نہ تال میں تھا

 

وہ لوٹ آیا تو یہ بات آشکار ہوئی

میں اک زمانہ کسی اور کے خیال میں تھا

 

مرا مرا سا کوئی جسم سانس لیتا ہوا

بجھا بجھا  سا کوئی  حسن خطّ و خال میں تھا

 

چراغ جلتے ہوئے ٹمٹما اٹھا یکدم

کچھ ایسا رنگِ تکبّر ہوا کی چال میں تھا

 

کنارِ وصل جو پہنچا تو ٹوٹ پھوٹ گیا

تھکن سے چُور جو فرقت کے ماہ و سال میں تھا

افتخار حیدر