ان کے آگے وہ حمزہ کی جانبازیاں | Salam Hazrat Hamza bin Abdul Muttalib

 

فوجِ اعدا میں گُھس کر سناں بازیاں

 دُور ہی سے کبھی تیر اندازیاں

 پرچمِ افتخارِ صفِ غازیاں

اُن کے آگے وہ حمزہ کی جانبازیاں

 شیرِ غُرّانِ سَطوَت پہ لاکھوں سلام

تضمین از مولانا اختؔرالحامدی

 

 

یہ تمنا یہ جذبہ یہ قربانیاں

 اور یہ ذوقِ شہادت کی بے چینیاں

 کافروں کی یہ میداں میں حیرانیاں

اُن کے آگے وہ حمزہ کی جانبازیاں

شیرِ غُرّانِ سَطوَت پہ لاکھوں سلام

 تضمین از ڈاکٹر سید ہلاؔل جعفری

 

 جاں نثارانِ مولا کی جانبازیاں

 اہلِ بطحا و طیبہ کی جانبازایاں

 حق پسند اہلِ تقوٰی کی جانبازیاں

اُن کے آگے وہ حمزہ کی جانبازیاں

شیرِ غُرّانِ سَطوَت پہ لاکھوں سلام

تضمین از حافظ عبدالغفّار حافؔظ

 

ابنِ اسود پہ وہ تیر اندازیاں

گاہے عتبہ پہ انکی سناں بازیاں

مرحبا مرحبا وہ سرافرازیاں

اُن کے آگے وہ حمزہ کی جانبازیاں

شیرِ غُرّانِ سَطوَت پہ لاکھوں سلام

 تضمین از صاحبزادہ ابوالحسن واحؔد رضوی

 

سرگروہِ شہیدانِ حق بے گماں

 وہ فلک مرتبت وہ سپہر آستاں

 شیرِ حق اور شیرِ شہِ انس و جاں

’’اُن کے آگے وہ حمزہ کی جانبازیاں

 شیرِ غُرّانِ سَطوَت پہ لاکھوں سلام‘‘

تضمین از محمد عبدالقیوم طاؔرق سلطان پوری​

 

شیرِ حق دین کا ضیغمِ سخت جاں

 عظمتِ شاہِ کونین کا پاسباں

 دشمنانِ نبی کا مٹایا نشاں

اُن کے آگے وہ حمزہ کی جانبازیاں

شیرِ غُرّانِ سَطوَت پہ لاکھوں سلام

تضمین از محمد عبدالقیوم طاؔرق سلطان پوری

 

 وہ رضاعی اخِ شاہِ کون ومکاں

 وہ شجاعت کا لاریب کوہِ گراں

 وہ شہامت کا ہر رَن میں اونچا نشاں

اُن کے آگے وہ حمزہ کی جانبازیاں

 شیرِ غُرّانِ سَطوَت پہ لاکھوں سلام

تضمین از محمد عبدالقیوم طاؔرق سلطان پوری