خوبصورت نعت سوہنے دیس عرب دے والی دی جینوں دید عطا ہو جاندی اے sohne des arab de wali di

 

سوہنے دیس عرب دے والی دی  جینوں دید عطا ہو جاندی اے

اوہندے مکدے پند حیاتی دے درداں تو شفا ہو جاندی اے

 

جینوں لگے عشق محمد ﷺ دا بن جان اویس بلال سید

سوہنے کملی والے دی جس تے اک وار نگاہ ہو جاندی اے

 

کرے رقص ہوا وچ گلیاں دے چم چم کے زلف محمد ﷺ دی

کلی ویکھ کے زلف حبیب والی ایہہ خود ہی صبا ہو جاندی اے

 

اوہو  روون ہجر دے وچ یارواوہو اکھیاں غیر نوں تکدیاں نئیں

جس اکھ نوں کملی والے دی اک جھلک عطا ہو جاندی اے

 

پیاں مہکن اج وی راہواں اوہ، جتھے لگے قدم محمدﷺ دے

جتھے سوہنا ماہی لنگھ جاندا مخمور فضا ہو جاندی اے

 

ایہہ گل تے خاص ہے عام نئیں ، اسی پڑھیا وچ حدیثاں دے

جنہوں یار دی دید نصیب ہووے اوہنوں دید ِخدا ہو جاندی اے

 

منگو صدقہ مدنی ماہی دا  ، رب یار دا واسطہ موڑ دا نئیں

جہڑی مرضی سوہنے دلبر دی اوہو رب دی رضاہو جاندی اے