قدم قدم پہ نواز دیتے مرے نبی کے قدومِ اقدس: خوبصورت نعت 2020

قدم قدم پہ نواز دیتے مرے نبی کے قدومِ اقدس

عظیم اتنے کہ عرش چومے مرے نبی کے قدوم ِاقدس

امام مالک کنارے چلتے قدم کی جا پہ قدم نہ آئے

یہ راہیں وہ تھیں جہاں لگے تھے مرے نبی کے قدومِ اقدس

خدا نے اس کی قسم اٹھا کر جہاں میں  عظمت نشاں بنایا

زمینِ مکہ پہ جب سے آئے مرے نبی کے قدومِ اقدس

نجات بیماریوں سے پائی مدینہ دار الشفا بنا ہے

زمینِ طیبہ نے جب سے چومے مرے نبی کے قدومِ اقدس

کھڑے تھے جب دو شہید اس پر اور ایک صدیق ؓساتھ ان کے

احد کی لرزش کو روکتے تھے مرے نبی کے قدوم ِاقدس

نصیب طیبہ کی سر زمیں کے جو رشکِ عرشِ علا بنی ہے

چھوئے تھے اس نے بڑے ادب سے مرے نبی کے قدومِ اقدس

جگانے کی ان میں کب تھی جرأت بس اپنے کافوری ہونٹ رکھ کر

ادب سے روح الامین نے چومے مرے نبی کے قدوم ِاقدس

جو اونٹ جابرؓ کا تھک گیا تھا  اب  اتنا  بھاگے  پکڑنا  مشکل

تھکے ہوئے اونٹ کو لگے تھے مرے نبی کے قدوم ِاقدس

پہاڑ خوشیوں سے وجد کرتے ادب سے قدموں کے بوسے لیتے

جب ان کی قسمت جگانے جاتے مرے نبی کے قدوم ِاقدس