پرانے وقتوں کی چار پائی پڑی رہے گی

جھگڑنا کاہے کا ؟ میرے بھائی پڑی رہے گی

یہ باپ دادا کی سب کمائی پڑی رہے گی

اندھیرے کمرے میں رقص کرتی رہے گی وحشت

اور ایک کونے میں پارسائی پڑے رہے گی

ہوا کی منت کرو کہ گھر کے دیے بجھے تو

اداس ہو کر دیا سلائی پڑی رہے گی

ہماری نظروں سے اور اوجھل اگر ہوئے تم

زمانے بھر کی یہ روشنائی پڑے رہے گی

تمہارے جانے کے بعد کیسی محلے داری

یقین کر لو ، بنی بنائی ، پڑی رہے گی

تمہارے ہاتھوں کا لمس کافی ہے ، لوٹ آؤ

میں ٹھیک ہو جاؤں گی، دوائی پڑی رہے گی

بزرگ رخصت ہوئےہیں لیکن برآمدے میں

پرانے وقتوں کی چار پائی پڑی رہے گی

کومل جائیہ