حقیقت کا اگر افسانہ بن جائے تو کیا کیجیے

حقیقت کا اگر افسانہ بن جائے تو کیا کیجیے

گلے مل کر بھی وہ بیگانہ بن جائے تو کیا کیجیے

ہمیں سو بار ترک ِ مے کشی منظور ہے لیکن

نظر اس کی اگر میخانہ بن جائے تو کیا کیجیے

نظر آتا ہے سجدے میں جو اکثر شیخ صاحب کو

وہ جلوہ  ،  جلوۂِ  جانانا  بن جائے تو کیا کیجیے

ترے ملنے سے جو مجھ کو ہمیشہ منع کرتا ہے

اگر وہ بھی تیرا دیوانہ بن جائے تو کیا کیجیے

خدا کا گھر سمجھ رکھا ہے اب تک ہم نے جس دل کو

قتیلؔ اس میں بھی اک میخانہ بن جائے تو کیا کیجیے

قتیلؔ شفائی