اشک آنکھوں سے جو ہوتے ہیں رواں بسم اللہ Ashk Aankhon se

 

اشک آنکھوں سے جو ہوتے ہیں رواں بسم اللہ

 مانگ جو مانگنا ہے گریہ کنا ں بسم اللہ

جسم کے دشت میں کر عشق رواں بسم اللہ

کہہ بھی دے روک نہیں اپنی زبان بسم اللہ

 یہ ہے درگاہ کرم یہ نہیں توڑیں گے بھرم

 درد دل سارے یہاں کر دے بیاں بسم اللہ

 اے مسافر اے ستم خوردہ عجم کے شاعر

بخت والا ہے جو آیا ہے یہاں بسم اللہ

 ہم فرشتے بھی یہیں بیٹھے ہیں تو بھی آجا

بیٹھ جا راندہ دربار جہاں بسم اللہ

میں کہوں روضہ اطہر  سے لپٹنا ہے مجھے

 مجھ سے دربان کہے آجا میاں بسم اللہ

  میں چراغوں پہ تیرے اسم کا دم پڑتا ہوں

رقص کرتے ہوئے پڑھتا ہے دھواں بسم اللہ

روز محشر میں کہوں نعت سنانی ہے مجھے

کہیں جبریل اشارے سے کہ ہاں بسم اللہ

میں نے پوچھا کہ پڑھیں مل کے محمد پہ درود

 ایک دم بول اٹھے کون و مکاں بسم اللہ

ہم بہکنے کے نہیں دید سے تھکنے کے نہیں

جام بھر بھر کے پلا پیر مغاں بسم اللہ

رقص کرنا ہے تو کر وجد میں آنا ہے توآ

ڈر نہ تحسین میاں لالے کی جاں بسم اللہ