دیوار الگ رنگ کی در اور طرح کا | یہ شہر پیمبر ہے نگر اور طرح کا | جبریل! یہاں چاہیے پر اور طرح کا

 

دیوار  الگ رنگ کی در اور طرح کا

یہ شہر پیمبر ہے نگر اور طرح کا

 

ہر شام اترتی ہے یہاں اور طرح سے

ہر صبح کا ہوتا ہے سفر اور طرح کا

 

کلیوں کے چٹکنے کی ادا ہے یہاں کچھ اور

گل اور طرح کا ہے شجر اور طرح کا

 

آسان نہیں منزلیں قوسین و دنٰی کیں

جبریل! یہاں چاہیے پر اور طرح کا

 

آتی ہے دبے پاؤں یہاں بادِ صبا بھی

آقا تیری گلیوں میں ہے ڈر اور طرح کا

 

سجدہ تو فقط رب دو عالم کے لیے ہے

پر طیبہ میں جھکا ہے میرا سر اور طرح کا

 

صد شکر مجھے اس سے موودت کا شرف ہے

جو سارے زمانے میں ہے گھر اور طرح کا

 

کاندھوں پہ نظر آتے ہیں سر اور طرح کے

نیزے کی بلندی پہ ہے سر اور طرح کا

 

عاجزؔ نے جو مانگا وہ عطا ہو گیا فورا ً

اترا ہے دعاؤں میں اثر اور طرح کا